女仔考車1 take pass

我一早知道自己操縱機械/空間感方面冇天份，所以為人為己都無打算學車。因為在香港實在沒有開車的需要。不過最近事件原因，也有可能有朝一日到外國生活的念頭，所以明知沒有天份也想學車，到時少一件事要兼顧。

幸好有朋友介紹了駕駛學院裏一位好師傅給我。最初學的時候，已經confirm了我沒有天份的事實。我看到一篇文章說教車師傅心目中學神有分等級﹕古惑仔最高﹑其次三行工人﹑最低是教師醫生。書讀得越多越唔識揸車。我師傅問介紹我的朋友，我係咪讀書好叻嗰D，即係佢覺得我真係好唔掂。的確，在學校我係一名學霸，所以在學車面前要低頭。有一次我俾師傅鬧到差D想喊，我由細到大只有俾老師錫，完全唔會有人鬧我。

我承認我真係一D sense都冇，學左幾堂連轉完彎都唔知要回軚，差D原地自轉剷左去隔離線度。我另一位學霸朋友都覺得學車好難，不過佢自信高過我，係咁話係D師傅教得唔structured。我都覺得雖然我的師傅好用心教，而駕駛學院已經算叫做有structured 過出面D師傅，但係我覺得始終好多野佢assume你摸到上手，根本冇講或者好難quantify。例如轉個90度彎要扭幾多軚。個個都同我講唔定ga wor, depends on 你個速度，揸揸下你就知ga la。由細到大邊個學科係咁? 又例如回軚，第一從來冇人講過要回軚，要點回，幾時回。可能你覺得呢D野係common sense，但係冇人講俾我聽我冇呢個概念就有時記得，有時亂起上黎就唔知自己做乜。又例如點擺架車係條線中間，我師傅教我睇左右鏡架車同條白色線距離，但係行車冇得成日睇住，每次學車都俾師傅鬧十幾次架車歪左。後來好好彩長途駕駛(駕駛學院package 包一次去考試範圍以外地區揸兩個幾鐘)係另一個師傅，佢一言驚醒夢中人。佢問我，你識唔識點擺架車係條線中間？我睇你99.9%都唔識ga la。你睇唔睇到地下個箭咀？你要將個司機位坐上去。我心諗司機位在右邊，司機位對正路中間個箭咀咪架車突左出左面？嗰陣時係街揸緊，師傅叫極我都唔敢坐上去個箭咀。到左右前後吉哂冇車我先心諗死就死啦咁直接將自己對正路中間。跟住師傅叫我睇下左右鏡，果然同白線距離一模一樣。之後我keep 住望左右鏡，真係只要自己係條路中間，架車就係條路中間﹗超神奇好似變魔術咁﹗我都唔係好敢相信。到下堂上正式堂時有時候心理上我都err on the right side少少，即刻俾師傅話我偏右。所以都係要擺到自己正一正中先可以。不過我揸車的生命就由呢一刻徹底改變。之前都唔知架車個位係邊，做所有野包括轉彎都冇可能對得準個位。而家行直路轉彎都有信心左好多。由此可見教車學車真係各師各法，師傅有講你就識，冇講就sorry，是極度沒有structure可言的一科。

不過我又唔會咁為自己開脫。個個都係跟一個咁冇structure的curriculum咁學，點解有人學得咁好，我就覺得咁差？點睇都係我自己問題 - 冇天份。

話說全港1 take pass 的合格率只有20%，駕駛學院合格率會高一些，女仔考合格率又會低一些，讀書好的又再看低一線。我到最後一堂都仲做緊D會即肥佬的ON居野，例如未放手掣就想開車。我師傅都睇得好開，後期都冇鬧我咁多，可能覺得都係要睇我造化。我從來都冇試過咁冇自信咁去應試。

到考牌當日，考試之前有一堂，我平時上堂會早到30分鐘，到考試之前嗰堂我偏偏由海怡半島地鐵站跑到氣絕咁去到都要遲到4分鐘。好彩係上堂唔係考試啫。上堂個師傅又因為某D原因唔係一向教我個師傅。呢個師傅都好好，由上車到落車一路係咁再溫馨提示我呢樣嗰樣。我講過唔同師傅講既野好唔同，present的方法又唔同，所以我極之welcome又有第二個人講多次。

完左堂之後坐係車等考官上車。係車入面戴住安全帶等個段時間真係緊張到唔知咩叫做緊張。不過好在考官好快就上左車，早過考試時間成十幾分鐘(好似)。不過我想講我個考官勁高大靚仔﹗傳說中的考官係戴超ga ma，因為疫情今次考官係戴口罩。但係口罩以外黎講係超級高大靚仔﹗不過我的distraction就到此為止因為考路試的緊張完全吞噬左我。後來我問返其他朋友，有D考左幾次，大家都話從來無論師傅同考官都係亞叔，我諗我係exception。

我考嗰幾日都斷斷續續出太陽同落狗屎交替。我考當日朝早又落狗屎。好在我由地鐵站奪命狂奔到駕駛學院冇落雨，考的時候都晒到死咁。我有試過落雨學車所以唔係好怕，不過我諗過窄路調頭要係咁伸個頭出去望，如果落狗屎三號風球咁既款，我又點開車窗伸頭望呢？我成個頭會濕哂兼睇唔到不突止，仲會整濕哂架車同D雨撇到埋考官到又情何以堪呢？不過卒之我都冇問到師傅呢個問題。所以人地話考車係睇運數我好同意。

我睇到網上有人話見到考官剔張form 會個人頹哂。我考完窄位調頭同泊車考官都有剔，仲要唔係少咁既款。我唔知原來咁係正常，仲心諗死啦會唔會連窄位調頭同泊車都肥左。不過好在我身為學霸，個心理質素好好。有D人考試緊張臨場表現會打折扣。我的體質很幸運是在考試表現得比平常好，好似運動員在大賽可以做到personal best咁。考官剔完我擔心左兩秒又全副精神被考試的緊張吸返入去黑洞入面。

駕駛學院好就好在在全個學院範圍甚至出街，只要是學院車都會讓考試車行先。有一個在學院入面的位我對面有另一架學車。佢停左係讓路路口前面打死火燈。我同佢都係讓路冇話邊個有優先權。嗰一刻我個腦一片空白。考過車的人就明，明明平日見到會識反應的事，考車時見到會望住佢唔明企左係度。我望到佢一對黃色燈，死啦即係點解呢？平時學院附近已經見得少。兩秒後諗起丫應該係死火燈。咁佢停正係讓路口打死火燈又咩意思呢？又諗多三秒，丫應該係讓我喎。之後我先識反應開出去。呢五秒只係我回想起的時間，可能在現實中係好快，亦有可能考官已經等到唔耐煩。唉，考車真係元神出竅的體驗。

之後出街，我精神崩緊到一個點，連考官同我講所有指示例如前面轉右入利榮街，我都緊張到講唔到嘢，淨係點頭，好似講嘢會洩左度氣咁。後尾連頭都費事點，就咁打燈咁佢應該知道我聽到啦。同埋我終於明點解個個人都要考多過一次，因為真係咩都會發生。有人衝出馬路呀﹑有工人放左D雜物喺你條線度是BAU。師傅提過我有兩個位有巴士站，要小心有巴士開出黎。我兜過個條街不下20次，從來D巴士都係泊係度唔郁。丫我考牌嗰下就係正我轉入去個條街嗰一刻開出黎喎。又邊個話D車見到你考緊牌會體諒你唔爬你頭？就係好彩師傅有提我有個位D車好鍾意爬D學車頭，我又有望鏡見到佢，有停俾佢咋。知道自己冇天份，師傅講既野我都好用心記住做足，不過到最後都係靠平時做多D好事，咁就會好彩唔好有突發嘢。

如是者冇俾人踩停的情況下返到入學院。考官一句，就呢度停啦，就好瀟洒咁落左車。我熄左匙仲呆係架車度， 要師傅黎話落得車我先敢落車。一落車個下個人好似散左冇哂力咁，好想喊。之前嗰45分鐘嗰個唔係我自己，而係靠腎上腺素hold住的一個軀殼。我唔記得我去interview，在高層committee 面前present自己有咁緊張過。

元神出竅一直到返入學院入面等結果，等的時候完全沒有概念自己會唔會pass。好快師傅走黎同我講我pass左，因為唔係同一個師傅所以問我係咪第一次考同埋邊個師傅教，我心入面都有D沾沾自喜。

同其他女仔朋友講起，佢地一個考二次pass, 一個考左四次，一個肥左二次之後冇考，三個都跟出面師傅冇跟駕駛學院。我話其實只係駕駛學院特別易pass。佢地話咁你最初揀左駕駛學院呢個決定都係贏在起跑線上，係一個good decision。嘿，我D朋友真係好supportive。

我真係好proud of 自己，比起任何公開試﹑大學成績﹑CFA乜乜的更加激動。我唔係再係自己有天份的讀書度屈人機，而係自己冇天份的科目against all odds在不利的statistics上也可以1 take pass，克服到自己最驚最冇信心的野。我想同所有女仔講，千祈唔好俾人睇死，唔好睇死自己。人地睇死我唔緊要，我就係要做到，唔係俾人地睇，因為人地唔care，而係俾自己睇。

P.S. 嗱，1 take pass 並唔override我揸車屎的事實。如果有朝一日我要係路度揸車的話一定一定會補鐘.....