我人生最大的挫折 - 坐骨神經痛

2021年4月

因為COVID長期Work from Home，又少運動，所以尾龍骨坐得耐有啲痛。睇咗兩次GP又睇Physio又有睇骨科。好啲又唔好啲咁。

2021年7月

因為尾龍骨仲未好，所以去睇中醫針灸。中醫話我盆骨高低，條腰左右肌肉嚴重唔平衡，好大鑊。我由細到大有脊柱側彎，但係一D都唔痛。我諗係尾龍骨少少痛，做乜講到咁嚴重。

針灸完中醫叫我夜晚仰臥瞓。我平時係側右邊訓再將隻左腳屈膝成個人扭晒過去右邊。第一日仰臥訓起身有啲腰痛。第二日再痛啲。覺得唔對路變返側瞓但係都繼續痛。

2021年8月

慢慢開始唔單止瞓覺痛，白天都痛。佢唔係某些動作才痛，而是長期陰住陰住，痛到你做乜都冇心機。24/7 都痛，喺屋企企下坐下瞓吓拉下筋咁過日子。又去睇骨科同Physio，做physio 教啲運動，但係都冇乜改善。照咗X光同MRI，又話冇乜大問題。

呢段時間一直要維持某個姿勢，攝毛巾先瞓得着。去到月中開始痛到瞓唔到。連續兩三個禮拜連續不能瞓超過兩個鐘。夜晚10點幾瞓， 12點到起身，拉下筋、用下heat pad，行行企企，1點度再瞓。跟住三點到再起身，又再重複一次，四點再瞓到六點就再瞓唔到。我催眠自己話，其實人唔係一定要瞓覺，瞓唔到覺唔使太擔心和傷心。

睇骨科叫我做多啲運動，我四日內行左半個鐘山，跳左半個鐘aerobic, 游左半個鐘水同做左少少yoga. 其實唔係好多，但係搞到hip flexor （前面個肚同大髀連接摺埋嗰度）痛到痴左線。越嚟越差，連physio運動都做唔到。出去飲一餐茶都痛到面青全程唔講嘢。全天候work from home，不過都完全冇心機。

呢兩個月基本上日日都喺度喊，一路望住自己情況差落去，又做唔到運動，覺得好絕望。真係好想死，但係好怕落地獄永遠比蟲咬、被火燒。認真。

之前唔信奶奶做傳銷嗰啲保健品，而家開始食幾款。

2021年9月

個hip flexor 好返少少可以落公園行。有一日做少少yoga 個梨狀肌又痛到發咗癲。keep 住痛左兩三個星期… 又做唔到運動。

仲要搬新屋，我個狀況根本執唔到野，都係我老公執多。搬之前嗰晚執到半夜三間都未執完，執到一半得返半條人命攤屍左係張床。

老公想我行多啲，有一次去公園power walk 行左30分鐘後，對腳掌痛到發燙咁。唔行都痛。一個星期後慢慢好啲但係左腳踝行路會click click 聲。又唔敢行得多。

睇中醫介紹我去搵PT (personal trainer)。佢話我冇晒肌肉，唔好亂咁做運動。要針對性強化返肌肉先。於是我開始了自己之前完全想像唔到的PT生涯，跑攝取蛋白質quota。做咗兩堂條腰好似好咗啲。

有一日行街行行吓個腳板和腳後踭好痛。去睇physio話係亞基里士筋痛。一企喺度就痛，又變返唔係好行到，要著鞋墊同波鞋。小腿成條筋扯到好似就斷咁，大腿後面又會痺痛得非常厲害。

到呢個point我條腰打下全部部位都反覆痛，差不多隔日便會情緒崩潰一次，好像我做什麼事都錯的，覺得自己不會康復。

2021年10月

因為冇理由下半身周圍亂咁痛，一定有更加基礎的原因。我個中醫同老公開始屈我係情緒病引致周身痛。我自己都承認心理方面出現嚴重危機，但是面對痛症的折磨，我自己也沒有辦法。

由始至終我冇同阿爸阿媽講我情況咁嚴重，因為費事老人家擔心，最初以為很快會復原，怎知拖了這麼久。公司老闆知道我背痛，但是應該不知道嚴重性。

2021年11月

情況好少少，可以游咗幾次水。之後又腳痛所以停咗。

有一個星期整個人盜汗、潮熱、心悸到瞓唔到。睇咗內科驗血，又話冇事。再睇多次骨科照MRI。又refer 我去睇神經外科和婦科，都話冇問題。keep 住有睇physio。

2021年12月

開始會對腳、小腿無端端發熱發燙，腳掌有針吉，大腿後面扯住嘅感覺。有一日朝早起身，個pat pat發燙到我以為自己會死。終於我個廢柴physio話係坐骨神經痛。我又去搵中醫針灸，好似好少少。

有一日扭樽蓋用死力，左手腕好似有啲嘢移左位咁，之後就陰陰痛發唔到力。

又有一排左腳踝click 得太恐怖，每一步都click ，去睇中醫針灸正骨，啱啱拍完果下痛到我以為整隻腳斷咗。之後好似冇click咁多。

之前完全唔信風水，而家擺到一屋都係風水嘢。

2022年1月

個人好似扯線公仔咁，企都冇力，行路兩隻腳感覺完全唔同。好似全身啲力學都錯晒咁。半夜成對腳會痺發熱到痛醒，好在起身去個廁所飲杯水訓得返。我老公和我自己都同自己講，幾個月前完全訓唔到的時候我話過，只要我訓到覺就好開心，所以我應該要開心D。每日唯一look forward既野係等夜晚上床訓覺。

因為下半身亂咁痛，我自己係屋企做運動郁吓手郁吓頸，搞到條頸又開始痛，又手痺。

覺得中醫針灸好似有用過physio。個廢柴physio 越做越差，於是停咗。但係針灸都去到一個樽頸位。

開始去見心理輔導，次次見都由頭喊到落尾。

2022年2月

因為真的是走投無路，所以開始睇脊醫。之前一路冇睇是因為GP千叮萬囑唔好睇。但係身邊keep住有人話睇好咗，所以冇理由唔試。

第一次去到做咗檢查，照咗X光。脊醫話我盆骨高低，又有脊柱側彎，頸又冇弧度。要50堂，一個星期兩次，成個package四萬幾蚊，我公司保險唔包。我最初半信半疑，買住10堂先。佢叫我廿四小時戴住條belt 喺個hip度穩定盆骨。去咗四次已經比最壞時候好咗五成。脊醫話四至八個星期會完全唔痛。

2022年3月至6月

脊醫發現我左手腕和左腳踝啲骨都歪咗， keep住都要每次啪。佢都話點解我全身都歪歪地。

經過這一年，對於睇咗三個半月脊醫，到而家仲係痛呢件事，我一啲都唔surprise。到咗而家，我覺得個天唔會比我咁易完全唔痛。其實已經好咗95%，但係因為最差的時候實在很差，所以現在才有些像其他人口中形容的坐骨神經痛病癥。

感恩的是我現在在脊醫的guidance 下慢慢可以加強運動強度。而家個plan係隔日做運動：一星期做兩次45分鐘gym (15 min 行treadmill, 15min cross-trainer,10 min 踩單車），游一次水。個人開始有力返。但係個康復好似又去到一個樽頸。我之前成日會諗幾時先好返做返個正常人。到左而家可能個痛bearable左，雖然好多野做唔到(連工都返唔到)，但係爛爛地個身體都勉強生活到，我都費事再問自己呢個問題。

Recap 返呢十二個月

• 返唔到公司。我完全想像唔到自己坐八個鐘。全天候work from home
• 每日行吓企下瞓吓坐下等時間過
• 出街食飯坐夠一個鐘就要走，未食完就落街行一陣先返去。但係都係好唔舒服，返到屋企要即刻拉筋
• 咩全日outing 呀，打波行山，去picnic 、沙灘、迪士尼、離島呢啲唔使諗
• 只有見脊醫和做運動的日子覺得人生有一些希望

因為keep住都叫做出到街，所以絕大部份人都唔appreciate 我身心的痛苦。其他人的普通背痛和坐骨神經痛根本無法比擬。連我自己也催眠自己其實自己的情況並不是太嚴重，有很多人的痛症也比自己辛苦。最近發現可能是所有人和自己都否定自己唔開心的情緒，所以更加難受。所以的起心肝寫了這一篇記錄。

以上其實只是極簡要記錄，omit左中間仲有睇左好多好多次physio/ 中醫/GP，尤其是10月以後完全沒有心情寫日記。可能痛苦到我自己都唔想記得。

如果有人有相似情況想我介紹physio / 脊醫/ 骨科呢樣個樣歡迎留言。幫到的我都幫。骨科真係好廢，明明我痛到要死，照哂MRI都話冇事，又話好多痛症解釋唔到。

繼續update

2022年7月

去睇左一個我1月時候book的醫生，睇之前都唔知咩科。原來都係搞肌肉類似physio 既。不過要成2000蚊一次，好在下次覆診已經係10月... 佢話我而家係水尾，D神經線被刺激左成半年好敏感，要食藥鎮靜下佢地。

做運動好似有D成效。我本來51kg而家55kg..大拿拿多左4kg。做開gym就知增4kg肌肉好難。仲做到個人好似高左幾cm。不過個痛到左而家其實我都唔係好感覺到有咩分別。坐一個鐘以上都仲係辛苦到死，企下行下都冇用。除左合埋眼繼續去脊醫同做運動我都唔知可以點。點解多左咁多肌肉仲係痛？做多D好事孝順D唔知有冇用...

2022年10月

繼續合埋眼做運動(一個星期兩次游水兩次gym)同埋睇脊醫(一個星期兩次)。又去過一次中醫針灸，得閒叫老公幫我按下背脊咁。好似好慢好慢咁好左啲。可以連續慢跑到10分鐘，個人好大隻。^^

去之前睇個肌肉專科西醫覆診，佢叫我戴返個傳統腰封兩個星期先。我戴左第二日條腰痛到呢... 就conclude呢個西醫八字同我唔夾，可以不理。

2023年2月

脊醫推介我做pilates, 我朋友介紹左個可以開physio 單的pilates俾我。終於脊醫話一個星期去睇佢一次都得，有時間去搞D新野。新一年公司保險有新physio budget, 所以終於可以去試下。

第一次做，我D冇用左三十幾年的肌肉痛左我整整三大日。我以前都有做唔少唔同種類的運動，都冇試過痛得咁誇張。之後每一次去個日都攰到乜都做唔到。不過做左幾次個人感覺實左，企個posture好左。諗住一直做到個保險claim 爆啦，點知又經歷我人生最嚴重既腸胃炎，冇去左兩堂。之後好返再book 又要等兩個星期，所以結果成個月冇做。脊醫都好似醫到我有D唔耐煩，覺得我做乜好得咁慢。但係我自問真係呢個世界最努力最乖做運動既病人....而家個情況係返公司半日，坐下企下咁都唔會太唔舒服。未敢挑戰返足一日。

2023年4月

以為一路俾心機做pilates會一路平坦無事咁好返。但係以我之前兩年的經驗都知道呢件係冇可能的事。做左幾堂pilates又每日做佢俾我返屋企做的運動，開始條頸好痛。脊醫話我條頸好唔掂，頸椎第七節又突左出黎，叫我叫個physio 唔好俾我借左條頸力。因為實在太痛我自己又去左搵年幾前有搵過個運動治療師鬆返哂肩頸D筋膜。搞左一大排先叫做manageable。不過用力同做咩運動都好似會trigger到條頸。

同埋脊醫成年來不停提醒我無論睇咩specialist都好，唔好俾佢轉我條腰，一轉就會死咁。但係呢位physio 雖然effective，但係成日好想轉我條腰。我第一次同佢講我脊醫話唔轉得，佢plainly 話唔同意，不過都肯配合。

另外啱啱呢一次做完，到條腰痛到甩肺左幾日。我覺得要練的肌肉例如腳﹑背﹑肚﹑手，操練到點痛都得，腰同頸呢D chronic pain 弱點係non-negotiable。今次做完真係好擔心同好掙扎好唔好再去。但係因為上左7堂就覺得個人企得又直左﹑行上斜路/樓梯輕左﹑個人有力左又跑得順左好多，從來冇試過physio/ PT咁有效，所以內心好矛盾。

期間都有同老公去另外一間脊醫介紹話差唔多全港最有歷史的pilates 學校，發現原來呢個physio 做的比起出面的pilates重好多，其實似PT多D。

2023年6月

後來physio夾我要慢慢甩條SI belt，又半推半就咁夾我做轉的動作。真係比起之前一年瓶頸左的進度有好明顯改善。好彩有聽佢講唔理脊醫講。痛症的世界真係冇永遠同絕對。

2023年9月

而家基本除左去做physio之外全天候唔戴SI belt。個core實到嚇親自己。終於可以做crunch時明顯只用肚的肌肉。同埋做到半分鐘forearm plank。進步勁到physio係咁問我做乜事咁大力，係咪食左大力菜。

幾個月前physio話我條頸太緊，成日做crunch類動作時用左條頸力，叫我去搵人鬆下佢。

咁我去左之前個中醫介紹個運動治療師。哇，每一次去完都變左第二個人咁。

第1次﹕鬆左前胸 -> activate到左邊個external oblique，就咁跑下行下街左邊腰酸痛到咩咁。之後就用到了。

第2次﹕鬆左左邊TFL + IT band，右邊大腿前 -> feel到左femur明顯可以internal rotate，盤骨可以左shift

第3次﹕鬆兩邊gracilis同tibialis posterior -> 左邊個ankle明顯活動度高左，arch可以放底落地，左腳行同跑成套動作可以順暢做到出黎，令到glute都活動到，左腰都鬆左D。